There is something absolutely marvellous in this ghazal.
Read on

justjoo-e-sehr mai'n rehta hoo'n
fikr e ilm o hunar mai'n rehta hoo'n

tum samajhtey ho ghar mai'n rehta hoo'n
mai'n ki diwaar o dar mai'n rehta hoo'n

ba'd marney k sub hi rehtey hai'n
mai'n tao zinda qabar mai'n rehta hoo'n

naam letey huey bhi darta hoo'n
mai'n ik aisey shehr mai'n rehta hoo'n

apney bacchey ko bhaij kar school
mai'n hama waqt fikar mai'n rehta hoo'n

teri aa'nkho'n mai'n kuch tao hey warna
kiun mai'n inkey asar mai'n rehta hoo'n

hoo'n mai'n taara kisi ki aa'nkho'n ka
aur kisi ki nazar mai'n rehta hoo'n

mod deta hoo'n rukh hawaao'n key
khud hamesha bha'nwar mai'n rehta hoo'n

ho mulaqaat kis tarah tum se
mai'n tao aksar safar mai'n rehta hoo'n

jitna bacchta hoo'n khud numaai se
wutna ziyada khabar mai'n rehta hoo'n

mujh se asrar poochtey kya ho
kya bataoo'n kidhar mai'n rehta hoo'n